فيما كنت أجول بخاطري صباح اليوم في .....

فيما كنت أجول بخاطري صباح اليوم في رحبة الأغنام للإطلاع عن كثب عما ال إليه الشأن البهائمي بالمدينة ,شعرت ببعض الجوع و التعب فاتجهت توا إلى مطعم شعبي عبارة عن خيمة تشوى فيها أسماك السردين ,اتخذت كعادتي مكانا قصيا ,طلبت وجبة . في الانتظار تناهى الى مسامعي حوار ساخن دار غير بعيد عني بين مواطنين ,بخصوص القبلة الفيسبوكية التي تبادلها في الشارع المراهقان "روميو" ولد لمخنتر و" جولييت" بنت منانة:
المواطن أ : واتلات بنا ليام أ لحاج حتى ولينا كنشوفو دري قدو قد الفولة نازل بالبوسان فالشارع بحال شي "صردي" على نعجة خفيفة نار ما عرقات ما حشمات ما قالت "أح ضريتيني يا لكافر بالله منين شهرتي بيا فالفيسبوك فهاد لعواشر ديال العيد"
المواطن ب : واخلينا حتى انت ,درتو من الفولة قبة ,جوج دراري صغار كانو كايلعبو "لعريس و العروسة " أش فيها هادي؟ واش حنا منين كنا صغار ما لعبناهاش مع لبنات يا لعفريت نسيتي؟ فالتبن مرة و مرة تحت الدالية وتحت لمشماشة و مرة فوق شجرة الخروب واخلينا ساكتين..
المواطن أ: أش جاب شي لشي أ لحاج نهاك الله واش بسالاتنا كيف بسالات هاد الزمان؟ هادو زادوفيه...يالله خارجين من البيضة و باغيين يبيضو. يالله طالعين من الارض وباغيين يوصلو لسابع سما...والسيبة هادي.
المواطن ب: واييه واييه و لكن منين وصلات الأمور للبوليس و التحقيق و الاعتقال وابزاف أخويا هادشي .. أو...ما فكرتيش فالطروماطيزم اللي عايشينو هاد لبزاوز دابا بسباب الخلعة ؟ وهادو دراري صغارما عارفينش أش كايديرو..
المواطن أ: ما عارفينش أش كايديرو حيت ما مربيينش باش يعرفو و هادي فرصة باش يترباو شي شوية عند الشرفا..
المواطن ب: واسمع ا مولاي ,الوالدين هوما اللي كايربيو ماشي لمخزن. تربية لمخزن خايبة و كتعقد بنادم...
المواطن أ: وا فين هاد الوالدين بالسلامة ؟ الراجل مبلي بالتييرسي و الشقوفا و لمرا مضروبة على بالمسلسلات و الدوران فالجوطية..
المواطن ب: الله يكون فالعون , الدنيا صعيبة أ خويا "الساهلي" و الفقر كافر ...و الجهل شوية كتر..
المواطن أ: واللي مفور ليا الدم كتر هوما هادوك العنيبات و الموسطاشات ديال "حركة مالي" خرجو ليك كاملين بحال النحل كايتباوسو ليا فالزنقة ولاد الذين كفروا و ناشرين ليا بسالاتهم على الفيس .قالو ليك أ سيدي: "حنا متضامنين مع روميو و جولييت تاع الناضور..و باراكا من قمع الغرائز..و التضييق على" الليبيدو" .كلشي ولى كايتبوزا علينا بهاديك الهضرة الباسلة تاع هاداك الدجال ديال فرويد و هادوك الشلاهبية ديال " لي بيهافيوريست"..
المواطن ب: وشكون عاود تاني هاد "حركة مالي"؟ ياكما شي حركة كتنادي بالعدل و و تكافؤ الفرص فالتشغيل و كتحارب الرشوة
و كتناضل من أجل إعادة توزيع الثروة ...
االمواطن أ :أشمن عدل أشمن نضال أشمن تشغيل.واش هادو اصلا محتاجين لشي شغل.هادو شوية ديال المراهقين مرفحين غير ولد فلان و فلان.
و ماعندهم ما يدار. مقابلين لينا استغفر الله العظيم غير هاداكشي اللي تحت الصمتة بعيد عليك ودايرين منو قضية حياة أو موت..باش يتشهرو . كلشي دابا مضروب على الشهرة. و كايخرمز ليه شي تخرميزة باش يوصل ليها .سمعتي أ لحاج هاديك الأغنية اللي كتغنيها واحد الموسطاشة كتقول فيها "يو أر هاندسم لايك إنجل"
المواطن ب: شكون هادالمصيبة عاود تاني؟
المواطن أ: "والو والو هادي من بعد نعاود ليك عليها حيت دابا الدنيا مخلطة"...