بادرت للا الضاوية بمناسبة "سان فالنتان" ....

بادرت للا الضاوية بمناسبة "سان فالنتان" إلى تهنئة بعلها الحاج لمخنتر و قد تزينت بمنديل حريري أحمر جميل ربطته على شعرها بشكل بديع تبدو فيه أصغر من عمرها بعشرين سنة قائلة : 
- هابي فالنتاين أبو سنطيحة ديالي لعزيز.
- وايلي كفرتي يا الضاوية .هادي بدعة الغرب الكافر..
- و شنو فيها ا حليلي إيلا سمحت لنفسي بشوية ديال الرومانسية و عبرت لراجلي لعزيز بكلام حنين على نار حنينة كتعتمل فقليبي فهاد لعواشر ديال" سان فالينتينو"؟
- وا سمعي حنا ماشي ديال لكلام لحنين و ماشي ديال هاداكشي ديال الحب حنا ناس مومنين و أتقياء.
- كيفاش زعما ؟ حنا كمامر ديال النقير و تخسار الهضرة و صافي؟ علاه كاين شي مومن كايكفر بالمحيبة.
- و لكن هاد فالنتان كان قسيس كافر و هاد عيد الحب كايحتفلو بيه الكفار و حنا خصنا نخالفوهم.
- نخالفوهم زعما نحتفلو بعيد الكراهية مثلا؟ و لكم هاد الكفار كايحتفلو كذلك بعيد الأم و اليوم العالمي لحماية البيئة و اليوم العالمي للتسامح و اليوم العالمي لمحاربة الرشوة و اليوم العالمي للإمتناع عن التدخين و المخدرات شنو الفرق مادام النية سليمة و الغاية نبيلة خصوصا فهاد الظروف ديال الحرب و شيوع العنصرية و الكراهية و قلة الترابي فهاد الدنيا الناشفة؟
- باراكا عليا الضاوية من هاد الفلسفة الباسلة. فرعتي ليا راسي و طيرتي ليا التبويقة. سيري عمري ليا هاداك السبسي بالعشبة و شحري شي براد أتاي بالشيبة و شعلي التلفزيون نتفرجو على برنامج "مداولة "حيت هاد الليلة غادي يهضرو على هاداك الراجل اللي ذبح مراتو فالعيد لكبير.